XXXVIII Día de les Lletres Astruianes
El pasáu vienres 5 de mayu l’Academia de la Llingua Asturiana celebró nel Teatru Campoamor d’Uviéu la sesión abierta al públicu de la Xunta Estraordinaria cola que la institución festexa tolos años el Día de les Lletres Asturianes. Esta edición, que facía’l númberu trenta y ocho de la celebración, presentó unes característiques daqué particulares, centrándose arrémente l’actu en dos cuestiones concretes:
- Un homenaxe a les muyeres asturianes, celebrando con esti reconocimientu’l papel de la muyer nel procesu de caltenimientu y recuperación de la llingua asturiana en dómines pasaes y presentes.
- La entrega del «i Premiu Nacional de Lliteratura Asturiana» al escritor Xuan Bello. La creación d’esti premiu, que tien calter triañal, anunciárela la Presidenta de l’alla, Ana Mª Cano, el pasáu xxxvii Día de les Lletres de 2016.
Polo que se refier a la primera de les cuestiones citaes, l’homenaxe respuende a la decisión tomada nesti sen pola Academia’l pasáu mes ochobre de 2016 nuna xunta ordinaria. Acordies con ello, foi iguándose pasu ente pasu esta celebración nos sos destremaos aspeutos, qu’incluyeron de mou principal un númberu especial de la revista Lliteratura (el 33) que recueye solamente collaboraciones de muyeres escritores (poesía, prosa y traducción).
El «Premiu Nacional de Lliteratura Asturiana» premia’l conxuntu de toa una trayeutoria lliteraria fecha a lo llargo del tiempu en llingua asturiana. El xuráu d’esta primer edición axuntóse en xineru de 2017 y concedió’l premiu al escritor Xuan Bello por, ente otro, «la estraordinaria calidá y relevancia de la so trayeutoria lliteraria» y «la proyeición estatal ya internacional qu’algama la so obra».
Con munchu públicu nel teatru Campoamor, les encargaes d’abrir la celebración fueron la cantante de tonada Mariluz Cristóbal y la violinista Bárbara González-Quevedo Pedrayes, qu’interpretaron la pieza «Caleyucu». Entamó llueu l’actu y dempués de les intervenciones de Xuan Bello al recoyer el premiu y de la Presidenta de l’Academia, que pronunció’l discursu institucional, lleóse una esbilla de los testos inxeríos na revista Lliteratura. El pieslle a esti simbólicu xxxviii Día de les Lletres Asturianes púnxolo l’actuación del grupu «Muyeres» col so espectáculu País malva.